الطمع حكايات رومانى مكرم 2

سعاد زعقت بأعلى صوتها:

* “مش هتوصل! أنا مش هسمح لصباح ترفع راسها عليا وتتمنظر بفلوس جوزي.. لو بعت لها مليم واحد يا مدحت، لا أنا ولا عيالك هنقعد لك في البيت ده، وهقلبها حريقة على الكل!”

مدحت رد ببرود قاتل:

* “أعلى ما في خيلك اركبيه يا سعاد.. والبيت ده ميبقاش بيت مدحت لو الظلم فضل جواه.” وقفل السكة في وشها للمرة التانية.

### زيارة النار والغل

سعاد الحقد عماها تماماً، مأستحملتش تقعد في مكانها. لبست عبايتها ونزلت بسرعة متجهة للحارة الضيقة، الدم كان بيغلي في عروقها وعايزة تفش غلها في صباح.

وصلت للحارة، ودخلت بيت صباح من غير ما تخبط، زقت الباب برجليها ودخلت الصالة الصغيرة وهي بتصرخ:

* “أهلاً يا ست صباح! أهلاً يا شيخة جوامع، يا اللي عاملة نفسك غلبانة ومكسورة الجناح وأنتي عقربة من تحت لِتحت!”

صباح وقفت مذهولة، ونورا جريت وقفت جمب أمها بخوف. صباح قالت بهدوء ووجع:

* “في إيه يا سعاد؟ داخلة البيت كدة ليه وعايزة إيه تاني؟ مش كفاية اللي عرفناه؟”

سعاد قربت منها وعينيها بتطلع شرار:

* “عرفتوا إيه يا أم ديل؟ فاكرة نفسك شاطرة لما شغلتي بنتي ‘منة’ جاسوسة عليا وخليتيها تلطش الكلام وتنقله لأبوها في أستراليا؟ فاكرة لما تتمسكني لمدحت وتاخدي الـ 5000 جنيه إنك بقيتي هانم؟ لأ يا حبيبتي.. فوقي لنفسك، أنتي لسه صباح الشقيانة، وبنتك دي أخرها دبلوم زي ما قولتلك، مش هتوصل لمستوى عيالي أبداً!”

نورا بكت من القهر وقالت:

* “حرام عليكي يا خالتي.. إحنا عملنا لك إيه؟ إحنا عمرنا ما طلبنا من بابا مدحت حاجة، هو اللي كان بيبعت من نفسه وأنتي اللي كنتي بتاكلي حقنا!”

سعاد رفعت إيدها وشاورت في وش نورا بحقد:

* “اخرسي يا بت أنتي، متتكلميش معايا.. الفلوس دي فلوس جوزي أنا، وشقا عمري أنا وعيالي. الدهب اللي في إيدي ده أنا أولى بيه من ملازمك ودروسك الخصوصية.. والله يا صباح لو لمستي قرش واحد من فلوس مدحت، لأكون مخربة الدنيا فوق دماغك ودماغ بنتك، وهخلي الحارة كلها تتفرج عليكي!”

صباح بصت لأختها ونظرة الشفقة ظهرت في عينيها رغم الوجع، وقالت بكرامة:

* “أنا مش هرد عليكي يا بنت أبويا.. أنا هسيبك لربنا اللي كشفك من فوق سبع سموات من غير ما أفتح بوقي. الفلوس اللي جوزك هيبعتها دي حق بنتي اليتيمة اللي أنتي استكترتيه عليها.. وامشي برة بيتي يا سعاد، ماليش أخت بالغل ده.”

سعاد ضحكت بـغل وقالت وهي خارجة:

* “ماشي يا صباح.. الأيام بيننا، وهنشوف الـ 5000 جنيه دول هتنفعك ولا هتكون سبب في خراب بيوتنا كلنا!”