اجازه سعيده

كنت مسافره اصيف فى الشاليه بتاعى واخدت اختى بحجه انى اخليها تصيف معايا هى وولادها بس الحقيقة انى واخدها عشان تبقى خدامه عندى  هناك وانا استمتع براحتى

انا ظروفى الماديه افضل من اختى وجوزى عنده شاليه فى السخنه بنقضى فيه الاجازه بسافر انا قبل جوزى باسبوع عشان ارتب المكان وانضفه

وبصراحه العاملات هناك غاليين فقررت اعزم اختى بحجه انى عايزاها تغير جو هى وولادها لكن فى الحقيقه انا كنت حايباها ببناتها عشان ينضفولى الشاليه واوفر اجره العمال

وفعلاً لما طلبت من اختى انها تيجى ببناتها رحبت جداً ووافقت وبقت تجهز الاكل والحاجة اللى هتاخدها معاها عشان ماتتكلفش هناك

وفعلاً وصلنا الشاليه، وأول ما دخلنا وبدل ما أقولها ارتاحي من السفر، عملت نفسي تعبانة ومش قادرة أتحرك من المشوار. قلتلها: “معلش يا حبيبتي، أنا دايخة ومحتاجة أنام شوية، ممكن بس تظبطي الشنط وتعدي على المطبخ تروقيه وتجهزي لقمة سريعة للولاد؟”

اختي بطيبتها المعتادة قالت لي: “من عيني يا حبيبتي، ارتاحي أنتِ خالص ولا تشغلي بالك.”

ومن هنا بدأ المخطط بتاعي يتنفذ بالمسطرة. بقيت قايمة نايمة تسييد عليها وعلى بناتها. الصبح أصحيها بحجة إننا عايزين نفطر بدري عشان نلحق البحر، وهي وبناتها يجروا في المطبخ يعملوا الفطار، وطبعاً هما اللي يغسلوا المواعين وينضفوا مكاننا.

ولما ننزل البحر أو البيسين، أقعد أنا على الشيزلونج حاطة رجل على رجل، بنضارتي الشمسية وبشرب العصير بتاعي وهى بتخدمنى الاكل اللى نفسى فيه وانا واثقه فى نضافته وجودته ، وبناتها يجروا ورا ولادي الصغيرين عشان يخدوا بالهم منهم كانى جايبه فلبينيه وسفرجى وجوزى جه وشاف اللى بيحصل بس معلقش اهم حاجه كانت راحته ، وهي واقفه تحضر السندوتشات والحاجة اللي هنأكلها على الشط.

كنت ببص لها وهي عرقانة وتعبانة في الشمس، وأقول في نفسي: “أهو كده التوفير الصح، أهو أنا ميزت نفسي وريحت دماغي، ووفرت الألوفات اللي كنت هدفعها لشركات النظافة والشغالات هنا في السخنة، وأهو برضه اسمي عملت فيها خير وعزمت أختي الغلبانة وولادها يشموا هواء.”

بس طبعاً الطمع وعمايل الفساد دي مش بتدوم، وكان لازم يحصل حاجة تقلب التربيزة وتكشف المستور..

وفي ليلة من الليالي، بعد ما العيال كلهم ناموا من كتر التعب واللف طول اليوم، قعدت أنا وجوزي في تراس الشاليه بليل، والهوا كان يرد الروح. كنت قاعدة راخية ضهري ومبسوطة بالراحة والهدوء، وجوزي قاعد قدامي بيشرب شاي وبيتأمل البحر.