امراه فى ورطه ٢

جيهان (وهي خارجة وبترزع الباب): “ماشي يا رانيا. ماهو الحق مش عليكي الحق على الرمرام اللي بلانا بيكي بس ميبقاش اسمي جيهان لو مطلقتكيش النهاردة!”

(بعد ما جيهان مشيت بدقيقتين)بقلم نورهان العشري 

رانيا قفلت التسجيل، ووشها اتحول من البرود للانهيار التام في ثانية. مسكت الموبايل واتصلت بسعيد وهي بتشهق من العياط.

رانيا (بصوت مخنوق): “ألو.. يا سعيد.. الحقني يا سعيد، أنا مش هقدر أعيش هنا ثانية واحدة تانية.. مراتك جت بهدلتني قدام مامتك وهددتني ببيتي وعيالي وقالتلي كلام ميتقالش لست شريفة.”

سعيد (بفزع): “في إيه يا رانيا؟ جيهان عملت إيه؟ اهدي بس وفهميني.”

رانيا: “أنا مش هحكي، أنا سجلت كلامها عشان متقولش إني بتبلى عليها.. أنا هبعتلك التسجيل وتشوف الست اللي قولتلي إنها بنت أصول بتعمل فيا إيه وأنا في شقة مامتك وبخدمها.. أنا هلم هدومي وماشية يا سعيد، كرامتي وكرامة عيالي أهم من أي حاجة.”

قفلت رانيا السكة، وبعتت “الريكورد” فوراً.

(في مكتب سعيد)

سعيد سمع التسجيل، وسمع صوت جيهان وهي بتقول “شحاتة” و”هخليك تطلقها”، وشاف “جبروتها” وهو بيحاول يفتح صفحة جديدة.

سعيد (بيكلم نفسه بغضب): “بقى كدة يا جيهان؟ بتهددي بخراب البيت وبتغلطي فيا وفي مراتي؟ صبرك عليا .”

****

سعيد دخل شقة جيهان والشرار بيطير من عينيه، جيهان كانت قاعدة مستنياه وهي مجهزة “وصلة” نكد وعياط، لكنها اتفاجئت بسعيد بيحدف الموبايل على الترابيزة قدامها وصوت تسجيلها مالي المكان.

سعيد (بزعيق مكتوم بس يرعب): “إيه ده يا جيهان؟ إيه القرف اللي أنا سامعه ده؟ هي دي الهانم اللي المفروض بنتي تتعلم منها الأدب؟”بقلم نورهان العشري 

جيهان (ارتبكت وحاولت تداري بعد ما سمعت صوتها مجلجل في التسجيل): “أنا.. أنا كنت متعصبة، وهي اللي استفزتني يا سعيد، دي بتقولي إنك ركنتني زي الموديل القديم!”

سعيد (قاطعها بحدة): “تستفزك ولا متستفزكيش، أنتي مالك ومالها؟ أنتي روحتي لحد عندها ليه؟ أنا قولتلك مية مرة رانيا بقيت مراتي، وأنتي اللي رفضتي أطلقها لما عرفتي، وأنتي اللي طلبتي ترجعي شقتها وتعيشي فيها وهي تطلع فوق، ووافقت! وأنتي اللي قولتي العيال يقعدوا معاها عشان تريحي أعصابك وتاخدي وقتك، وبرضه وافقت!”

جيهان (بعياط تمثيل): “أنا كنت فاكرة إنها هتعرف مقامها، مش هتيجي تتدلع وتلبس وتتشيك وتعمل فيها ست الهوانم وهي شحاتة!”

سعيد (خبط على الترابيزة بقوة): “شحاتة ولا مش شحاتة، دي في عصمتي! واللي يغلط فيها يغلط فيا أنا. اللي حصل ده ميرضيش ربنا يا جيهان، ولا يرضي أي راجل عنده نخوة. عيالك  بيشتموها ويقولولها يا خدامة بتسليط منك، والنهاردة أنتي رايحة تهديها وتغلطي في شرفها وتقولي هخلي سعيد يطلقك؟ هو أنتي اللي بتمشيني يا جيهان؟”