امبارح بليل ٢
كامله
كريم بص على الساعة المعلقة في الصالة، الوقت كان بيمر بسرعة مرعبة، وعقارب الساعة كأنها بتتحول لسكاكين بتقطع في اللي باقي من كبريائه. لما لقاني ماسكة التليفون وباصة له بنظرة مفيهاش أي تراجع، عرف إن الكلام خلص. بدأ يلم هدومه في الشنطة وهو بيترعش، وكل شوية يبص لي ودموعه نازلة، مستني رشة حنية أو كلمة تقوله “خلاص أنا بهزر معاك”.. بس أنا كنت زي الصخر.
سحب الشنطة وخرج، وقفل الباب وراه.. المرة دي مكنش بيقفل الباب براحة عشان خايف أصحى، كان بيقفله وهو حاسس إن الدنيا كلها اتقفلت في وشه.
أول ما مشي، الشقة فجأة بقت واسعة.. واسعة وهادية بشكل مريح. دخلت الأوضة، نمت على السرير، ولأول مرة من أسبوعين نمت نوم حقيقي، عميق، من غير ما أعمل نفسي نايمة، ومن غير ما أخاف من حركة الشخص اللي جنبي.
تاني يوم الصبح، صحيت على صوت تليفوني بيرن. كان أحمد، ابن عمي.
“صباح الخير يا رانيا.. كله تمام؟”
“صباح النور يا أحمد. طمني، إيه الأخبار عندك؟”
أحمد أخد تنهيدة وقال لي: “حماتك قادت الليلة في الحجز. طبعا كريم جالها جري على الفجر، وكان هيموت من الرعب. هي حالياً بتتحقق معاها بتهمة حيازة كارت بنكي مجهول ومحاولة سحب مبالغ مش بتاعتها، بس الأهم من كل ده، إن السيستم طلع عليها حكمين غيابيين قدام في قضايا تبديد شيكات، يعني كده كده مكانتش هتخرج.”
سألته ببرود: “وكريم؟ عملتوا معاه إيه؟”
أحمد ضحك وقال: “كريم كان واقف برة زي الفراخ المبلولة. حاول يفهّم وكيل النيابة إن الكارت بتاع مراته وإن مفيش سرقة، بس لما واجهناه بإن الكارت مطلعش فيه غير 50 جنيه، وإن المحاولة كانت بنصف مليون، انهار تماماً. أنا سبته يروح عشان لسه مفيش بلاغ رسمي منك ضده بالسرقة أو الاشتراك، بس تفتكري هيسكت؟”
قلت له: “يسكت أو ميسكتش، أنا جاهزة لكل حاجة.”
نزلت في نفس اليوم ورحت لمكتب محامي كبير، من اللي بيخلصوا القضايا من أقصر طريق. حطيت قدامه كل الأوراق: عقود ملكية الشقة اللي باسمي، كشوف الحسابات البنكية اللي بتثبت إن الفلوس ورث شرعي ليا، وتقرير البنك الفوري عن محاولة السحب الفاشلة بالليل.
“أنا عايزة قضية طلاق للضرر، وإنذار طرد من الشقة لو فكر يعتب بابها، وبلاغ رسمي بالسرقة وخيانة الأمانة.”
المحامي ابتسم وبص في الأوراق وقال لي: “أنتِ محاسبة شاطرة قوي يا مدام رانيا.. مأمنة نفسك بالمليم. القضية دي مش هتقعد شهور، وكريم هيمضي على كل اللي أنتِ عايزاه وهو يبوس إيدك عشان تتنازلي عن قضية السرقة.”