متجوز من ٨ سنين ١
حكايات رومانى مكرم
أنا متجوز من 8سنين وبثق في مراتي جدا جدا ا وعندنا عيال مراتي بتشتغل وليها مرتب وكانت دايمآ بتقولي إن مرتبها 6الاف جنيه وانا باخد المرتب ده عشان يساعد في مصاريف البيت ونعمل حاجه لاولادنا لكن اكتشفت إن مرتبها الحقيقي 12 الف جنيه وهى بتديني 6 الاف وتخبئ الباقي لما واجهتها قالت إن الفلوس دي بتساعد بيها ابوها الى علمها ووصلها للوظيفه دى وعشان بتصرف على اخواتها فى تعليمهم عشان انا قولتلها من هنا ورايح القبض كله يجيلي لكنها رفضت خالص وقالت إنها مش هتقطع المساعدة عن أهلها
البدايه
تمن سنين وأنا نايم على وداني، تمن سنين وأنا فاكر إن الست اللي معايا في البيت وفي السرير، اللي شالت اسمي وجابت عيالي، هي كتاب مفتوح بنقرا فيه سوا. كنت باصحى من النجمة، عيني في وسط راسي، أطحن في الصخر عشان لقمة العيش وعشان العيال دي تكبر مستورة. وهي كانت تيجي أول الشهر، تحط الست آلاف جنيه في إيدي وتقول لي: “ادي مرتب الشقا كله يا بو العيال، إيد على إيد تساعد، عشان نأمن مستقبل الولاد”. وكنت أشيلها فوق راسي، وأقول أصيلة وبنت ناس وعمرها ما اتعالت عليا بقرشها.
لحد اليوم الأسود دا.. اليوم اللي كل حاجة فيه اتهدت فوق دماغي.
كنت قاعد في الصالة براجع ورق تقديم المدارس بتاع الواد الصغير، وتلفونها كان جمب مني على الترابيزة. رن رنة ورا التانية، ورسائل ورا بعض. في الأول نفضت، بس لما الرن زاد، ومكتوب اسم “حسابات الشركة”، قلت يمكن حاجة طارئة. فتحت الشاشة.. وكانت الصدمة اللي شلت حركتي.
رسالة البنك الرسمية بتحويل المرتب: “تم إيداع مبلغ 12,400 جنيه مصري في حسابكم”.
عيني زغللت، الدم هرب من عروقي وبقيت حاسس إن الحيطة بتلف بيا. 12 ألف؟ مش 6؟ يعني تمن سنين وأنا مخدوع؟ تمن سنين وهي بتديني النص وتشيل النص في الدرى؟ أنا اللي كنت بحرم نفسي من اللقمة عشان أجيب لها وللعيال اللي نفسهم فيه؟
دخلت من باب الشقة، شايلة أكياس خضار وبتضحك. ضحكتها الرقيعة دي نزلت على قلبي زي مية النار. أول ما شافت وشي متغيم، ضحكتها اختفت.
“في إيه يا أحمد؟ مالك قبت وشك كدة ليه ولابس الوش الخشب؟”
مسكت التلفون ولفيت الشاشة في وشها، وصوتي كان طالع مبحوح من كتر الغيظ: “الوش الخشب عشان عايش مع واحدة وشين.. إيه دا يا مدام؟ إيه الـ 12 ألف دول؟ أنتي كنتي بتغفليني؟”
وشها جاب ألوان، اتسمرت مكانها والأكياس وقعت من إيدها على الأرض. الطماطم اتدحرجت في الصالة، بس مكنش فيه وقت للمظاهر. حاولت تجمع ثباتها بسرعة، لوت بوزها وقالت بنبرة فيها تحدي غريب عمري ما شفته منها: