حكايات صافى هانى
”طمني يا فاروق بيه، المدام عاملة إيه؟”
”لحقناها يا عم حلمي، الحمد لله. بس قولي… أنت شفت كريم أو بسمة خرجوا من البيت بعد ما أنا مشيت؟”
عم حلمي وطى صوته وقال: “كريم نزل بعدك بنص ساعة، فتح شنطة عربيتك النقل اللي أنت راكنها، وأخد منها حاجة، وبعدها طلع تاني.. أنا كنت مراقبه من ورا الشيش”.
طلعت على الشقة علطول. خبطت خبطة واحدة قوية. كريم فتح، وشه كان مخطوف، وبسمة كانت واقفة وراه لافّة شال حوالين كتافها وبتترعش.
”بابا؟ ماما جرالها حاجة؟” كريم سأل وصوته بيقطع.
دخلت ومردتش عليه. رحت دايركت على المطبخ. بدأت أفتح الضلف، أدور في الزبالة، لحد ما لقيت علبة دواء مهدئ شريطها متقفل منه تلات حبوب بس، والعلبة مكنتش باسم حد فيهم. وفي نفس الوقت، عيني جت على تليفون ماجدة… كان محطوط فوق التلاجة، ومتداري ورا علبة شاي، ومقفول.
حطيت التليفون وعلبة الدوا في جيبي، وخرجت الصالة.
”الدوا ده بتاع مين؟” رميت العلبة على الترابيزة.
كريم بلع ريقه وبص لبسمة: “ده… ده بتاع بسمة يا بابا، كانت بتاخده عشان قلق النقل”.
”وبسمة كانت بتحط منه في الشربات لجميلة؟” صجيت فيهم بصوتي اللي بيهز قاعات التحقيق. “تليفون أمك فوق التلاجة ليه ومقفول؟ وليه سيبتوها مرمية على الأرض يومين ومنعتوا الإسعاف؟”
بسمة عيطت وقعدت على الكنبة: “والله العظيم ما كان قصدنا نأذيها! إحنا بس كنا عايزينها تفضل نايمة كام يوم عشان نخلص الحوار!”
”حوار إيه؟!”
كريم نزل على ركبه وقرب مني: “يا بابا أنا كنت مزنوق… الشقة دي مأجزها إيجار جديد بمبلغ وقدره مش تمليك زي ما قلتلكم، وكان عليا شيكات وممكن أتحبس. أنا بس… كنت محتاج توكيل من أمي عشان أسحب الفلوس اللي في حساب المعاش بتاعها، كنت هسحبهم وأرجعهم تاني والله! بس هي لما جت ولقت البيت فاضي ومفيش عفش، بدأت تشك وتزعق وتقول إنها هتكلمك… أنا اتميت، وبسمة قالت نهدّيها بأي حاجة لحد ما أفكر هعمل إيه!”
بصيت لكريم… ابني اللي ربيته. اللي كنت فاكر إنه بس طايش، طلع مستعد يهدّ حيل أمه ويموّتها بالبطيء عشان قرشين.
”أنت أخدت إيه من عربيتي لما نزلت ورايا؟” سألته ببرود يخوف.
كريم حط راسه في الأرض وصوته مش طالع: “المحفظة التانية بتاعتك… اللي فيها فيزا الحساب المشترك بتاعك أنت وأمي… كنت عارف الباسورد”.
مديت إيدي وأخدت منه المحفظة اللي كانت في جيبه. بصيت له لأخر مرة، وبصيت لبسمة اللي كانت بتمسح دموعها.
”أنا بلغت الإسعاف بصفتي جوزها… بس المحضر اللي هيتفتح الصبح في النيابة، هتشرف عليه بنفسي بصفتي لواء شرطة سابق”.